ഫ്ലാഷ് ന്യൂസ്

... 2016-17 അധ്യയനവ൪ഷത്തേ യു എസ് എസ്  Result publish ചെയ്തു ഉപജില്ലാതല Resultന് താഴെ ക്ലിക്ക് ചെയ്യൂ...........

Sunday, 27 December 2015

TERMS വര്‍ക്ക് ഷോപ്പ്

TERMS ന്റെ ഉള്ളടക്കം മെച്ചപ്പെടുത്തുന്നതിനുള്ള ദ്വിദിന ശില്‍പശാല ഐ ടി @ സ്കൂളില്‍ വിദ്യാഭ്യാസ ഡെപ്യൂട്ടി ഡയറക്റ്റര്‍ വി രാമചന്ദ്രന്‍ ഉദ്ഘാടനം ചെയ്തു. ബഹുമാനപ്പെട്ട ഡി പി ഐ, എ ഡി പി ഐ തുടങ്ങിയവര്‍ വളരെ താത്പര്യത്തോടെയാണ് കാസര്‍ഗോഡ് ജില്ലയില്‍ നടന്നു വരുന്ന റിസോഴ്സ് ബ്ലോഗ് നിര്‍മാണത്തെ കാണുന്നതെന്ന് അദ്ദേഹം പറഞ്ഞു. കേരളത്തിലെ സ്കൂള്‍ വിദ്യാഭ്യാസത്തിന്റെ മുന്നോട്ടു പോക്കിന് ഏറെ സഹായകമായ ഒരു സംരംഭത്തിനാണ് നാം തുടക്കമിട്ടിരിക്കുന്നതെന്ന് അദ്ദേഹം പറഞ്ഞു.
ചടങ്ങില്‍ അധ്യക്ഷത വഹിച്ച ഡയറ്റ് പ്രിന്‍സിപ്പല്‍ ഡോ പി വി കൃഷ്ണകുമാര്‍ ഈ സംരംഭത്തില്‍ രാപ്പകലില്ലാതെ മുഴുകിയ റിസോഴ്സ് ടീം അംഗങ്ങളെ അഭിനന്ദിച്ചു. TERMS വിജയത്തിലെത്തിക്കുന്നതില്‍ കാസര്‍ഗോഡ് ഐ ടി @ സ്കൂള്‍ കോര്‍ഡിനേറ്ററും മാസ്റ്റര്‍ ട്രെയിനര്‍മാരും നല്‍കി വരുന്ന പിന്തുണയെ പ്രകീര്‍ത്തിച്ചു. ജില്ലയില്‍ നിലനില്‍ക്കുന്ന അക്കാദമിക കൂട്ടായ്മ ഒന്നുകൊണ്ടു മാത്രമാണ് TERMS നെ ഇന്നത്തെ നിലയിലേക്ക് എത്തിക്കാനായതെന്ന് അദ്ദേഹം അനുസ്മരിച്ചു. ജില്ലാ പഞ്ചായത്ത് ഭാരവാഹികള്‍, ഡി ഡി ഇ, ഡി ഇ മാര്‍, എ ഇ ഒ മാര്‍, എസ് എസ് എ, ആര്‍ എം എസ് എ എന്നിവയുടെ വിവിധ തലങ്ങളില്‍ പ്രവര്‍ത്തിക്കുന്നവര്‍, അധ്യാപക സംഘടനാ നേതാക്കന്മാര്‍ എന്നിവര്‍ നല്‍കി വരുന്ന പിന്തുണയും അദ്ദേഹം എടുത്തു പറഞ്ഞു.
ഐ ടി ഫാക്കല്‍ട്ടി സീനിയര്‍ ലക്ചറര്‍ ഡോ. പി വി പുരുഷോത്തമന്‍ സ്വാഗതമോതി. ഐ ടി @ സ്കൂള്‍ ജില്ലാ കോര്‍ഡിനേറ്റര്‍ എം പി രാജേഷ് TERMS ന്റെ നിലവിലുള്ള സ്ഥിതി വിശകലനം ചെയ്തു.  ഐ ടി ഫാക്കല്‍ട്ടി ലക്ചറര്‍ കെ വിനോദ് കുമാര്‍ ശില്‍പശാലയുടെ ഉള്ളടക്കവും ലക്ഷ്യവും അവതരിപ്പിച്ചു.





Thursday, 10 December 2015

ഇക്കോക്ലബ്ബ് പ്രദര്‍ശനം

കന്നട ഡി എഡ് ഒന്നാം വര്‍ഷ വിദ്യാര്‍ഥികളുടെ പരിശീലനത്തിന്റെ ഭാഗമായി പരിസ്ഥിതി പ്രദര്‍ശനം നടന്നു. ഗ്രൂപ്പുളായി തിരിഞ്ഞ് മത്സരബുദ്ധിയോടെ നടത്തിയ പ്രദര്‍ശനം ഏറെ ശ്രദ്ധേയമായി. ടീച്ചര്‍ എജുക്കേറ്റര്‍ ടി പുഷ്പയുടെ നിര്‍ദേശപ്രകാരമാണ് അധ്യാപകവിദ്യാര്‍ഥികള്‍ പ്രദര്‍ശനമൊരുക്കിയത്. ഔഷധസസ്യങ്ങള്‍, സസ്യങ്ങളുടെ വിവിധ ഭാഗങ്ങള്‍, പഴയ ഉപകരണങ്ങള്‍ തുടങ്ങിയവ പ്രദര്‍ശനത്തിന് മാറ്റു കൂട്ടി.
പ്രദര്‍ശനം ഡയറ്റ് സീനിയര്‍ ലക്ചറര്‍ ഡോ. പി വി പുരുഷോത്തമന്‍ ഉദ്ഘാടനം ചെയ്തു. ടീച്ചര്‍ എജുക്കേറ്റര്‍ നാരായണന്‍ ദേലമ്പാടി അധ്യക്ഷനായിരുന്നു. ടീച്ചര്‍ എഡുക്കേറ്റര്‍ ടി പുഷ്പ ആശംസകള്‍ നേര്‍ന്നു. എ യു ശില്‍പ സ്വാഗതം പറഞ്ഞു. പ്രൈമറി വിദ്യാര്‍ഥികളുള്‍പ്പെടെ നിരവധി പേര്‍ പ്രദര്‍ശനം കണ്ടു.









Wednesday, 25 November 2015

ക്ലസ്റ്റര്‍ പരിശീലനം - മൊഡ്യൂള്‍ നിര്‍മാണം

28.11.2015 ന് നടക്കുന്ന ക്ലസ്റ്റര്‍ പരിശീലനത്തിന്റെ മൊഡ്യൂള്‍ നിര്‍മാണം രണ്ടു കേന്ദ്രങ്ങളിലായി നടന്നു. ഹൈസ്കൂള്‍ വിഭാഗം കാസര്‍ഗോഡ് അനക്സിലും പ്രൈമറി വിഭാഗം ഹോസ്ദുര്‍ഗ് ബി ആര്‍ സി യിലും നടന്നു. അനക്സില്‍ നടന്ന പരിശീലനം ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാര്‍ ഉദ്ഘാടനം ചെയ്തു. ഡി ഇ ഒ വേണുഗോപാലന്‍ അധ്യക്ഷനായിരുന്നു. ഡി ഇ ഒ മഹാലിംഗേശ്വര്‍ രാജ് , ആര്‍ എം എസ് എ ജില്ലാ അസിസ്റ്റന്റ് കോര്‍ഡിനേറ്റര്‍ ശ്രീനിവാസ്, ഡയറ്റ് ഫാക്കല്‍ട്ടി അംഗങ്ങളായ പി ഭാസ്കരന്‍, ഡോ. പി വി പുരുഷോത്തമന്‍ എന്നിവര്‍ പരിശീലനത്തിന് നേതൃത്വം നല്‍കി. ഹോസ്ദുര്‍ഗില്‍ നടന്ന ശില്പശാല എസ് എസ് എ ജില്ലാ കോര്‍ഡിനേറ്റര്‍ ഡോ. എം ബാലന്‍ ഉദ്ഘാടനം ചെയ്തു. എ ഇ ഒ മാരായ പ്രകാശന്‍, സദാനന്ദന്‍ എന്നിവര്‍ സംബന്ധിച്ചു. ഡയറ്റ് ഫാക്കല്‍ട്ടി ടി ആര്‍ ജനാര്‍ദനന്‍ പരിശീലനത്തിന് നേത‍ൃത്വം നല്‍കി.




Friday, 13 November 2015

സ്കൂള്‍ പാര്‍ലമെന്റ് പരിശീലനം

ഡയറ്റിന്റെ ആഭിമുഖ്യത്തില്‍ കാസര്‍ഗോഡ് ജില്ലയില്‍ നടപ്പിലാക്കുന്ന സ്കൂള്‍ പാര്‍ലമെന്റ് പ്രവര്‍ത്തനങ്ങളുടെ അധ്യാപക പരിശീലനം കാസര്‍ഗോഡ് ഐ ടി @ സ്കൂളിലും ഹോസ്ദുര്‍ഗ് ബി ആര്‍ സി യിലുമായി നടന്നു. കാസര്‍ഗോഡ് വിദ്യാഭ്യാസ ജില്ലാ പരിശീലനം ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാര്‍ നിര്‍വഹിച്ചു. ഡയറ്റ് സീനിയര്‍ ലക്ചറര്‍ ഡോ. പി വി പുരുഷോത്തമന്‍ അധ്യക്ഷനായിരുന്നു. ഡയറ്റ് സീനിയര്‍ ലക്ചറര്‍ പി ഭാസ്കരന്‍ കോഴ്സിനു നേതൃത്വം നല്‍കി. നിര്‍മല്‍ കുമാര്‍, ഗംഗാധരന്‍ പി വി, ഗംഗാധരന്‍ നായര്‍ ടി, സുരേഷ് പി, സുകുമാരന്‍ പി, സഞ്ജീവ എം തുടങ്ങിയവര്‍ സെഷനുകള്‍ കൈകാര്യം ചെയ്തു.






കാഞ്ഞങ്ങാട് ബി ആര്‍ സി യില്‍ നടന്ന  കാഞ്ഞങ്ങാട് വിദ്യാഭ്യാസ ജില്ലാ പരിശീലനം ഡി ഇ ഒ മഹാലിംഗേശ്വര്‍ രാജ് ഉദ്ഘാടനം ചെയ്തു. ഡയറ്റ് ഫാക്കല്‍ട്ടി അംഗങ്ങളായ ടി എം രാമനാഥന്‍, ഡോ. രഘുറാം ഭട്ട്, സുധാകരന്‍ നടയില്‍, പവിത്രന്‍ ടി, മനോജ് കെ മാത്യു, ഗോപാലകൃഷ്ണന്‍ പി, അബ്ദുള്‍ ബഷീര്‍ തുടങ്ങിയവര്‍ നേതൃത്വം നല്‍കി.

Saturday, 31 October 2015

TERMS അധ്യാപകരിലേക്ക്

31.10.2015 ന് നടന്ന ക്ലസ്റ്ററിലൂടെ കാസര്‍ഗോഡ് ഡയറ്റും ഐ ടി @ സ്കൂളും ചേര്‍ന്ന് രൂപം കൊടുത്ത TERMS എന്ന ബൃഹത്ത് പദ്ധതി അധ്യാപകരെ പരിചയപ്പെടുത്തി. ഡിജിറ്റല്‍ സാമഗ്രികള്‍ കണ്ടെത്താനും നിര്‍മിക്കാനും പ്രയാസപ്പെടുന്ന അധ്യാപകരെ സംബന്ധിച്ച് ഇതൊരു വലിയ അനുഗ്രഹമാണെന്ന് അധ്യാപകര്‍ അഭിപ്രായപ്പെട്ടു. ഇപ്പോള്‍ ചേര്‍ത്തിരിക്കുന്ന സാമഗ്രികള്‍ പരിശോധിച്ച് ഏതൊക്കെ എങ്ങനെയൊക്കെ ഉപയോഗപ്പെടുത്താമെന്ന ലഘുചര്‍ച്ച പല കേന്ദ്രങ്ങളിലും നടന്നു. നിര്‍ദേശങ്ങള്‍ അറിയിക്കാനുള്ള മെയില്‍ ഐ ഡി, ഫോണ്‍ നമ്പര്‍ എന്നിവ പരിചയപ്പെടുത്തി. മെച്ചപ്പെട്ട സാമഗ്രികള്‍ കൈയിലുള്ളവര്‍ അവ മെയില്‍ ചെയ്തോ അവയുടെ സ്രോതസ്സിനെ സംബന്ധിച്ച വിവരം നല്‍കിയോ പദ്ധതി മെച്ചപ്പെടുത്താന്‍ അധ്യാപകരുടെ സഹകരണം തേടിക്കൊണ്ടാണ് സെഷന്‍ സമാപിച്ചത്. കാസര്‍ഗോഡ് വിദ്യാഭ്യാസ ജില്ലയിലെ വിവിധ ഹൈസ്കൂള്‍  പരിശീലന കേന്ദ്രങ്ങള്‍ ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാര്‍, ആര്‍ എം എസ് എ അസി. പ്രോജക്റ്റ് ഓഫീസര്‍ ശ്രീനിവാസ്. ഡയറ്റ് ഇ ടി സീനിയര്‍ ലക്ചറര്‍ ഡോ. പി വി പുരുഷോത്തമന്‍ എന്നിവര്‍ സന്ദര്‍ശിച്ചു. ഉപജില്ലാ കേന്ദ്രങ്ങള്‍ എ ഇ ഒ മാര്‍, ഡയറ്റ് ഫാക്കല്‍ട്ടി അംഗങ്ങളായ പി ഭാസ്കരന്‍, ടി എം രാമനാഥന്‍, ടി ആര്‍ ജനാര്‍ദ്ദനന്‍, ഡോ. രഘുറാം ഭട്ട്, കെ വിനോദ്കുമാര്‍, എം വി ഗംഗാധരന്‍ തുടങ്ങിയവര്‍ സന്ദര്‍ശിച്ചു
TERMS ന്റെ അഡ്രസ് :         termsofdiet.blogspot.in

Wednesday, 28 October 2015

ക്ലസ്റ്റര്‍ ഡി ആര്‍ ജി പരിശീലനം

2015 ഒക്റ്റോബര്‍ 31 നടക്കുന്ന ക്ലസ്റ്റര്‍ പരിശീലനത്തിന്റെ ഡി ആര്‍ ജി പരിശീലനം ഐ ടി @ സ്കൂളില്‍ നടന്നു. ഹൈസ്കൂള്‍ വിഭാഗം ഇംഗ്ലീഷ്, സംസ്കൃതം, ഉറുദു എന്നിവയുടെ പരിശീലനമാണ് നടന്നത്. ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാര്‍, ഡി ഡി ഇ സൗമിനി കല്ലത്ത്, ആര്‍ എം എസ് എ അസിസ്റ്റന്റ് പ്രോജക്റ്റ് ഓഫീസര്‍ ശ്രീനിവാസ് എന്നിവര്‍ സന്ദര്‍ശിച്ചു. ഡോ. പി വി പുരുഷോത്തമന്‍ സെഷന്‍ വിശദീകരണം നടത്തി. മാര്‍ തോമ ബധിര വിദ്യാലയത്തില്‍ നടന്ന ഇതര വിഷയങ്ങളുടെ പരിശീലനത്തിന് ഡയറ്റ് സീനിയര്‍ ലക്ചറര്‍ പി ഭാസ്കരന്‍ നേതൃത്വം നല്‍കി.


Tuesday, 20 October 2015

ഐ എസ് എം സെമിനാര്‍

ഈ വര്‍ഷത്തെ രണ്ടാമത്തെ ഐ എസ് എം സെമിനാര്‍ ഐ ടി @ സ്കൂളില്‍ വെച്ച് 20. 10. 2015 ന് നടന്നു. ജില്ലാ വിദ്യാഭ്യാസ ഉപഡയറക്റ്റര്‍ സൗമിനി കല്ലത്ത് ഉദ്ഘാടനം നിര്‍വഹിച്ചു. ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാര്‍ ആധ്യക്ഷം വഹിച്ചു.
ഡയറ്റ് സീനിയര്‍ ലക്ചറര്‍ ടി ആര്‍ ജനാര്‍ദനന്‍ ആമുഖാവതരണം നടത്തി. ഐ എസ് എം ടീം അംഗങ്ങളായ രവീന്ദ്രനാഥ റാവു (എ ഇ ഒ കാസര്‍ഗോഡ്), ഹെലന്‍ (എ ഇ ഒ ചിറ്റാരിക്കല്‍), ടി എം രാമനാഥന്‍ (ഡയറ്റ്), രാമചന്ദ്രന്‍ നായര്‍ (ഡയറ്റ്), ഡോ. പി വി പുരുഷോത്തമന്‍ (ഡയറ്റ്) എന്നിവര്‍ വിലയിരുത്തലുകള്‍ അവതരിപ്പിച്ചു.
വിവിധ സ്കൂള്‍ പി ടി എ പ്രസിഡന്റുമാര്‍, മാതൃസമിതി പ്രസിഡന്റുമാര്‍, പ്രധാനാധ്യാപകര്‍, എസ് ആര്‍ ജി കണ്‍വീനര്‍മാര്‍ എന്നിവര്‍ പ്രതികരണങ്ങള്‍ അവതരിപ്പിച്ചു. സ്കൂള്‍ പ്രവര്‍ത്തനങ്ങള്‍ മെച്ചപ്പെടുത്താന്‍ അവര്‍ ആവിഷ്കരിച്ചിട്ടുള്ള വിവിധ പരിപാടികള്‍ വിശദീകരിച്ചു. ഇത്തരം സന്ദര്‍ശനങ്ങള്‍ തുടര്‍ന്നും ഉണ്ടാവണമെന്ന് എല്ലാവരും അഭിപ്രായപ്പെട്ടു.
സീനിയര്‍ ലക്ചറര്‍ രാമചന്ദ്രന്‍ നായര്‍ ചര്‍ച്ച ക്രോഡീകരിച്ചു. സ്കൂള്‍ ഇനിയും മെച്ചപ്പെടുത്താന്‍ ഉതകുന്ന ഭാവിപരിപാടികള്‍ ആവിഷ്കരിക്കണമെന്ന ആഹ്വനത്തോടെ യോഗം പിരിഞ്ഞു.



Monday, 19 October 2015

കര്‍ണാടകയില്‍ നിന്നും പഠനസംഘം

കര്‍ണാടകയിലെ ബെല്ലാരി ജില്ലയില്‍ നിന്നുള്ള വിദ്യാഭ്യാസ പഠനസംഘം കാസര്‍ഗോഡ് ഡയറ്റ് സന്ദര്‍ശിച്ചു. ഡി ഡി പി ഒ വീരണ്ണ എസ് ജെട്ടി, ഡയറ്റ് വൈസ് പ്രിന്‍സിപ്പല്‍ ശ്രീനിവാസ റെഡ്ഡി എന്നിവരുടെ നേതൃത്വത്തില്‍ വന്ന നാല്‍പതംഗ സംഘത്തില്‍ ബി ഇ ഒ മാര്‍, ഡയറ്റ് ഫാക്കല്‍ട്ടി അംഗങ്ങള്‍, ബി ആര്‍ സി പ്രതിനിധികള്‍ തുടങ്ങിയവര്‍ അംഗങ്ങളായിരുന്നു.
ഡയറ്റ് പ്രിന്‍സിപ്പല്‍ ഡോ. പി വി കൃഷ്ണകുമാറിന്റെ നേതൃത്വത്തില്‍ സംഘത്തെ സ്വീകരിച്ചു. തുടര്‍ന്ന് ഡയറ്റ് കോണ്‍ഫറന്‍സ് ഹാളില്‍ നടന്ന ആശയവിനിമയം ഒരു മണിക്കൂര്‍ നീണ്ടു. പ്രിന്‍സിപ്പലിനെ കൂടാതെ ടീച്ചര്‍ എജുക്കേറ്റര്‍ ഡി നാരായണ, ഫാക്കല്‍ട്ടി അംഗങ്ങളായ പി ഭാസ്കരന്‍, ഡോ. രഘുറാം ഭട്ട്, ഡോ. പി വി പുരുഷോത്തമന്‍, കെ വിനോദ്കുമാര്‍,  എന്നിവര്‍ വിവിധ പദ്ധതികളെ കുറിച്ച് അവതരണങ്ങള്‍ നടത്തി. ബ്ലെന്റ്, ടേംസ്, സ്കൂള്‍ പാര്‍ലമെന്റ്, ലെന്‍സ്, പി ജി ടി സി എന്നീ ഡയറ്റ് പദ്ധതികളില്‍ സംഘം സംതൃപ്തി രേഖപ്പെടുത്തി. ബെല്ലാരി ജില്ലയിലെ തുടര്‍ന്നുള്ള വിദ്യാഭ്യാസ പ്രവര്‍ത്തനങ്ങള്‍ക്ക് ഇവ ഉത്തേജനം പകരുമെന്ന് വീരണ്ണ എസ് ജെട്ടി പറഞ്ഞു.



Thursday, 6 August 2015

പ്രവൃത്തിപരിചയം - ഡി ആര്‍ ജി

പ്രവൃത്തിപരിചയവുമായി ബന്ധപ്പെട്ട് സ്കൂളില്‍ നടക്കേണ്ട പ്രവര്‍ത്തനങ്ങള്‍ മെച്ചപ്പെടുത്തുന്നതിന്റെ ഭാഗമായി ഡയറ്റ് വിവിധ ഉപജില്ലകളില്‍ നടത്താന്‍ ഉദ്ദേശിക്കുന്ന ഏകദിന കോഴ്സിന്റെ ഡി ആര്‍ ജി പരിശീലനം ജി എം യു പി കാസര്‍ഗോഡ് നടന്നു.
ഡയറ്റ് ഫാക്കല്‍ട്ടി ടി ആര്‍ ജനാര്‍ദ്ദനന്‍ സ്വാഗതമോതി. ഡിഇഒ ഇ വേണുഗോപാലന്‍ ഉദ്ഘാടനം ചെയ്തു. ചടങ്ങില്‍ എഇഒ രവീന്ദ്രനാഥ റാവു അധ്യക്ഷനായിരുന്നു. ഡയറ്റ് ഫാക്കല്‍ട്ടി അംഗങ്ങള്‍, ഡി ആര്‍ ജി മാര്‍ തുടങ്ങിയവര്‍  പങ്കെടുത്തു. ഭാര്‍ഗവിക്കുട്ടി ടീച്ചര്‍ നന്ദി പറഞ്ഞു.
 പരിശിലനത്തിന് സീനിയര്‍ ലക്ചറര്‍ ടി ആ ര്‍ ജനാര്‍ദ്ദനന്‍, ആര്‍ പി മാരായ ബെന്നി, ഹരി എന്നിവര്‍ നേതൃത്വം നല്‍കി.





Sunday, 2 August 2015

ക്ലാസ് പി ടി എ യ്ക്ക് ഒരു മാതൃക

എങ്ങനെ ക്ലാസ് പി ടി എ നന്നായി നടത്താം ? ജി എല്‍ പി എസ് കയ്യൂരിന്റെ ഈ മാതൃക കാണൂ.

കുട്ടികള്‍ക്കൊപ്പം രക്ഷിതാക്കളും ക്ലാസ്സില്‍..

 

Wednesday, 29 July 2015

പുതുതായി നിയമനം ലഭിച്ച പ്രധാനാധ്യാപകര്‍ക്കുള്ള പരിശീലനം


പുതുതായി പ്രധാനാധ്യാപകരായ നിയമനം ലഭിച്ച അധ്യാപകര്‍ക്കുള്ള മൂന്നു ദിവസത്തെ പരിശീലനം ഐടി സ്ക്കൂളില്‍ ആരംഭിച്ചു. ജില്ലാ വിദ്യാഭ്യാസ ഉപഡയറക്ടര്‍ ശ്രീ സി രാഘവന്‍ പരിശീലനം ഉദ്ഘാടനം ചെയ്തു. ‍ഡയറ്റ് സീനിയര്‍ ലക്ചര്‍ കെ. രാമചന്ദ്രന്‍ നായര്‍ സ്വാഗതം പറഞ്ഞ ചടങ്ങില്‍ ഡയറ്റ് സീനിയര്‍ ലക്ചര്‍ ഡോ. പി വി പുരുഷോത്തമന്‍ അധ്യക്ഷനായിരുന്നു. കാസര്‍കോട് ഉപജില്ലാ വിദ്യാഭ്യാസ ആഫീസര്‍ ശ്രീ രവിന്ദ്രറാവു, ഐടിസ്ക്കൂള്‍ജില്ലാ കോ ഓര്‍ഡിനേറ്റര്‍ ശ്രീ എം പി രാജേഷ്, കാസര്‍ഗോഡ് ജില്ലാവിദ്യാഭ്യാസ ആഫീസര്‍ ശ്രീ ഇ വേണുഗോപാലന്‍ എന്നിവര്‍ ആശംസ അര്‍പ്പിച്ചു സംസാരിച്ചു. ‍ഡയറ്റ് ലക്ചര്‍ കെ വിനോദ് കുമാര്‍ നന്ദി രേഖപ്പെടുത്തി.


ജില്ലയിലെ വിവിധ ഉപജില്ലകളില്‍ നിന്ന് എത്തിയ 61 അധ്യാപകര്‍ പരിശീലനത്തില്‍ പങ്കടുക്കുന്നുണ്ട്. ജില്ലാ വിദ്യാഭ്യാസ ഉപഡയറക്ടര്‍ ശ്രീ സി രാഘവന്‍ ഇന്‍സ്റ്റിറ്റ്യൂഷണല്‍ മാനേജ്മെന്റ് എന്ന വിഷയത്തിലും ഡയറ്റ് ലക്ചര്‍ കെ വിനോദ് കുമാര്‍ ടീം ബില്‍ഡിംഗ് ആന്റ് ലീഡര്‍ഷിപ്പ് എന്ന വിഷത്തിലും ചെറുവത്തൂര്‍ ഉപജില്ലാ വിദ്യാഭ്യാസ ആഫീസ് സീനിയര്‍ സൂപ്രണ്ട് ശ്രീ രവിനാഥ് ഓഫീസ് അഡ്മിനിസ്ട്രേഷന്‍ ആന്റ് രജിസ്ട്രേര്‍സ് എന്ന വിഷയത്തിലും ക്ലാസ്സുകള്‍ എടുത്തു. പരിശീലനം ജൂലൈ 31 വെള്ളി, ആഗസ്ത് 1 ശനി എന്നീ ദിവസങ്ങളില്‍തുടര്‍ന്നു നടക്കും.

Tuesday, 28 July 2015

LENS – 2015 ശില്പശാല


ഡയറ്റിന്റെ ആഭിമുഖ്യത്തില്‍ ഈ വര്‍ഷം സംഘടിപ്പിക്കുന്ന LENS ( Science Enrichment Programme For Schools in connection with Light & Soils Year) പദ്ധതിയുടെ ഉള്ളടക്കത്തെ സംബന്ധിച്ചും നടത്തിപ്പിനെ കുറിച്ചും ആശയരൂപീകരണം നടത്തുന്നതിനുള്ള ഏകദിന ശില്പശാല പടന്നക്കാട് കാര്‍ഷിക സര്‍വകലാശാലയില്‍ നടന്നു.
കോര്‍ഡിനേറ്റര്‍ ഡോ. രഘുറാം ഭട്ട് സ്വാഗതം പറഞ്ഞു. ഡയറ്റ് പ്രിന്‍സിപ്പല്‍ ഡോ. കൃഷ്ണകുമാറിന്റെ അധ്യക്ഷതയില്‍ കാര്‍ഷിക കോളേജ് അസോസിയേറ്റ് ഡീന്‍
ഡോ. എം ഗോവിന്ദന്‍ ശില്പശാല ഉദ്ഘാടനം ചെയ്തു. ഡയറ്റ് ഫാക്കല്‍ട്ടി മെമ്പര്‍ പി ഭാസ്കരന്‍ ചടങ്ങില്‍ പങ്കെടുത്തവര്‍ക്ക് നന്ദി പറഞ്ഞു.
രണ്ടാമത്തെ സെഷനില്‍ പരിപാടിയെ സംബന്ധിച്ച വിഷയാവതരണം ഡയറ്റ് ഫാക്കല്‍ട്ടി ഡോ. പി വി പുരുഷോത്തമന്‍ നടത്തി. തുടര്‍ന്ന് പരിപാടിയെ സംബന്ധിച്ച് നടന്ന ചര്‍ച്ചയില്‍ ഡോ. പി ആര്‍ സുരേഷ് (ഡിപ്പാര്‍ട്ട്മെന്റ് ഓഫ് സോയില്‍ സയന്‍സ്, കാര്‍ഷിക കോളേജ്), ഡോ. ഉദയാനന്ദന്‍ (ഡിപ്പാര്‍ട്ട്മെന്റ് ഓഫ് ഫിസിക്സ്, നെഹ്റു കോളേജ്),ഡോ. ഉണ്ണികൃഷ്ണന്‍ യു (ഡിപ്പാര്‍ട്ട്മെന്റ് ഓഫ് എന്‍വയോണ്‍മെന്റ് സയന്‍സ്, സെന്‍ട്രല്‍ യൂണിവേഴ്സ്സിറ്റി ഓഫ് കേരള), പ്രൊഫ. എം ഗോപാലന്‍ (റിട്ടയേര്‍ഡ് പ്രൊഫസര്‍) എന്നിവര്‍ പങ്കെടുത്തു.
ഉച്ചയ്ക്കുശേഷം നടന്ന ഗ്രൂപ്പ് ചര്‍ച്ചയില്‍ ഇരുപതോളം വിദഗ്ധാധ്യാപകര്‍ പങ്കെടുത്തു. ഡോ. കെ എം ശ്രീകുമാര്‍, പ്രൊഫ. ഗോപാലന്‍ എന്നിവര്‍ ഇടപെട്ടു സംസാരിച്ചു. ഡോ. രഘുറാം ഭട്ട് ചര്‍ച്ചകള്‍ ക്രോഡീകരിച്ചു സംസാരിച്ചു. വരുന്ന ആറുമാസം വര്‍ഷാചരണവുമായി ബന്ധപ്പെട്ട് സ്കൂളുകളില്‍ നടക്കേണ്ട പരിപാടികള്‍ക്ക് ഉടന്‍ അന്തിമരൂപം നല്‍കും. അധ്യാപകപരിശീലനം, ഹാന്റ് ഔട്ട് നിര്‍മാണം തുടങ്ങിയ പരിപാടികളുടെ നിര്‍ദേശം വന്നു.





Saturday, 25 July 2015

TERMS പ്രവര്‍ത്തനോത്ഘാടനം


കാസര്‍ഗോഡ് ഡയറ്റും ഐ ടി @ സ്കൂളും ചേര്‍ന്ന് ഈ വര്‍ഷം നടപ്പിലാക്കുന്ന നൂതനസംരംഭമായ TERMS (E-Resourse Management System for Teachers) ന്റെ ആശയരൂപീകരണ ശില്പശാലയ്ക്ക് തുടക്കമായി. ഡയറ്റ് പ്രിന്‍സിപ്പലിന്റെ സാന്നിധ്യത്തില്‍ ഡിഡിഇ സി രാഘവന്‍ ഉദ്ഘാടനം നിര്‍വഹിച്ചു.  സ്കൂള്‍ വിദ്യാഭ്യാസ മേഖലയ്ക്ക് കാസര്‍ഗോഡ് ജില്ല ഈ വര്‍ഷം നല്‍കുന്ന മികച്ച സംഭാവനയാണ് ഈ സംരംഭമെന്ന് അദ്ദേഹം പറഞ്ഞു. ഇതിനു മുന്‍കൈയെടുത്ത ഡയറ്റിനെയും അതിന് എല്ലാവിധ സാങ്കേതിക പിന്തുണയും നല്‍കുന്ന ഐ ടി @ സ്കൂളിനെയും അദ്ദേഹം അഭിനന്ദിച്ചു.
ഡിഇഒ ഇ വേണുഗോപാലന്‍, ഐ ടി @ സ്കൂള്‍ ജില്ലാ കോര്‍ഡിനേറ്റര്‍ എം പി രാജേഷ്, ഡയറ്റ് ഫാക്കല്‍ട്ടി അംഗങ്ങളായ ഡോ പി വി പുരുഷോത്തമന്‍, കെ വിനോദ്കുമാര്‍ എന്നിവരും തദവസരത്തില്‍ സന്നിഹിതരായിരുന്നു.
എം പി രാജേഷ്, ഡോ. പി വി പുരുഷോത്തമന്‍, കെ വിനോദ്കുമാര്‍, കെ ശങ്കരന്‍, പി രാജന്‍, വി കെ വിജയന്‍ എന്നിവര്‍ പരിശീലനത്തിന് നേതൃത്വം നല്‍കി.
വിഷയവിദഗ്ധരായ 35 അധ്യാപകര്‍ ശില്പശാലയില്‍ പങ്കെടുത്തു.
ഹൈസ്കൂള്‍ ക്ലാസുകളിലെ മലയാളം, കന്നട, ഇംഗ്ലീഷ്, ഹിന്ദി, ഫിസിക്സ്, കെമിസ്ട്രി, ബയോളജി, സോഷ്യല്‍ സയന്‍സ്, ഗണിതം, കലാവിദ്യാഭ്യാസം, പ്രവൃത്തിപരിചയം, കായികവിദ്യാഭ്യാസം എന്നീ വിഷയങ്ങളുമായി ബന്ധപ്പെട്ട് ഉപയോഗപ്പെടുത്താവുന്ന വിവിധ പഠനവിഭവങ്ങളടങ്ങിയ ബ്ലോഗുകളുടെ ഒരു സമാഹാരമാണ് TERMS ലൂടെ യാഥാര്‍ഥ്യമാവുക. രണ്ടാംഘട്ട ശില്പശാല ആഗസ്റ്റ് 7, 8 തീയതികളില്‍ നടക്കും.

Tuesday, 21 July 2015

പ്രിയ അനസ് മാഷിന് സ്നേഹാഞ്ജലികള്‍

ഡയറ്റ് ലാബ് സ്കൂളിലെ പ്രഗല്‍ഭനായ അധ്യാപകനും ഏവര്‍ക്കും പ്രിയപ്പെട്ടവനുമായ ‍ഞങ്ങളുടെ പ്രിയ അനസ് മാസ്റ്റര്‍ ജൂലായ് 18 ന് നമ്മെ വിട്ടുപിരിഞ്ഞ വിവരം വേദനയോടെ പങ്കുവെക്കുന്നു. അദ്ദേഹത്തിന്റെ സ്നേഹസ്മരണയ്ക്കുമുമ്പില്‍ ആദരാഞ്ജലികള്‍ അര്‍പ്പിക്കുന്നു.


Thursday, 16 July 2015

ക്ലസ്റ്റര്‍ ഡി ആര്‍ ജി

2015 ജൂലൈ 21 മുതല്‍ 28 വരെ നടക്കുന്ന ക്ലസ്റ്റര്‍ പരിശീലനത്തിന്റെ ഹൈസ്കൂള്‍ വിഭാഗം ഡി ആര്‍ ജി തയ്യാറെടുപ്പ് കാസര്‍ഗോഡ് ജി യു പി എസ് ഹാളില്‍ രണ്ടുദിവസമായി നടന്നു. ഒന്നാം ദിവസത്തെ പരിശീലനം കാസര്‍ഗോഡ് ഡിഇഒ ഇ വേണുഗോപാലനും രണ്ടാം ദിവസത്തേത് ആര്‍ എം എസ് എ അസിസ്റ്റന്റ് പ്രോജക്റ്റ് ഓഫീസര്‍ രാമചന്ദ്രന്‍ വി വി യും ഉദ്ഘാടനം ചെയ്തു. പരിശീലനത്തിന് ഡയറ്റ് ഫാക്കല്‍ട്ടികളായ പി ഭാസ്കരന്‍, ഡോ. പി വി പുരുഷോത്തമന്‍, ടി എം രാമനാഥന്‍, ടി ആര്‍ ജനാര്‍ദ്ദനന്‍, ഡോ. രഘുറാം ഭട്ട്, എസ് ആര്‍ ജിമാരായ സതികുമാര്‍, പ്രമോദ് അടുത്തില എന്നിവര്‍ നേതൃത്വം നല്‍കി.




സംസ്ഥാന തലത്തില്‍ ലഭിച്ച മൊഡ്യൂളിനെ പ്രാദേശിക ആവശ്യങ്ങള്‍ക്കമുസരിച്ച് ഭേദഗതി വരുത്തി മെച്ചപ്പെടുത്തി. സ്കൂള്‍ ബ്ലോഗുകളെ സജീവമാക്കാനും ബ്ലോഗ് വഴിയുള്ള റിസോഴ്സ് ഷെയറിങ്ങ് ശക്തമാക്കാനും STEPS മായി ബന്ധപ്പെട്ട ഗൃഹസര്‍വേ ജൂലൈ 31 നകം പൂര്‍ത്തീകരിക്കാനുമുള്ള തീരുമാനങ്ങള്‍ ഫലപ്രാപ്തിയിലെത്തിക്കാന്‍ അധ്യാപകരുടെ സഹകരണം തേടും. ദിനാചരണങ്ങ‍ള്‍, ക്ലബ്ബ് പ്രവര്‍ത്തനങ്ങള്‍, യൂണിറ്റ് മൂല്യനിര്‍ണയം തുടങ്ങിയവ മെച്ചപ്പെടുത്താനുള്ള തയ്യാറെടുപ്പുകള്‍ ക്ലസ്റ്ററില്‍ നടക്കും. ഒപ്പം അടുത്ത മാസത്തേക്കുള്ള സമഗ്രാസൂത്രണം, യൂണിറ്റ് ടെസ്റ്റിന്റെ ഒരുക്കം, സാമ്പിള്‍ ടീച്ചിങ്ങ് മാനുവല്‍ തയ്യാറാക്കല്‍ എന്നിവയ്ക്ക് ഊന്നല്‍ നല്‍കാനും തീരുമാനിച്ചു. ക്ലസ്റ്ററിന് വരുന്ന അധ്യാപകര്‍ TB, HB.TM,  ഉത്പന്നങ്ങളുടെ സാമ്പിളുകള്‍  തുടങ്ങിയവ കൊണ്ടുവരണം.

റിസോഴ്സ് ഷെയറിങ്ങ് ശക്തിപ്പെടുത്താന്‍ വിഷയാധിഷ്ഠിത റിസോഴ്സ് ബ്ലോഗുകള്‍ തയ്യാറാക്കുന്ന പദ്ധതിയെ കുറിച്ചുള്ള വിവരവും അധ്യാപകര്‍ക്ക് ക്ലസ്റ്ററില്‍ നല്‍കാന്‍ തീരുമാനിച്ചു.